Mësohen emrat të cilët u arrestuan gjatë operacionit të mbrëmjes së djeshme në Portin e Durrësit nga ku u sekuestruan 45 kilogramë e 500 gramë lëndë e dyshuar narkotike kokainë, e cila ishte e porositur nga dy grupe kriminale bëhet me dije nga autoritetet. Në pranga janë vënë administratori i kompanisë Arben Ferizi 30 vjeç, banues në Prishtinë, me detyrë administrator në kompaninë që kishte porositur ngarkesën e mishit të pulës në Brazil si dhe Egert Varguv 39 vjeç, banues në Tiranë, me detyrë agjent doganor në Portin e Durrësit, i kontraktuar nga kjo kompani. Dy të arrestuarit akuzohen për veprën penale “Trafikimi i lëndëve narkotike”.
Kujtojmë se sasia e kokainës vinte tranzit nga Brazili për në Maqedoninë e Veriut, dhe siç njoftohet u kap falë informacioneve që dispononte Policia Kriminale e Drejtorisë Vendore të Policisë Durrës në operacionin e koduar “Tranzit”.
Kontejneri ku ndodhej lënda narkotike ishte i mbushur me mish pule. Kjo është një mënyrë e re për sjelljen e ngarkesave me kokainë nga vendet e Amerikës Latine pasi në herët e mëparshme jemi mësuar ta shikojmë brenda kontenierëve me banane apo qymyr. Kjo është sasia e dytë e drogës që sekuestrohet nga Policia e Durrësit në port në harkun kohor të një muaji pasi më 17 maj një tjetër ngarkesë prej 59 kg kokainë u kap në një kontejner me qymyr që vinte nga Ekuadori.
Policia njofton se vijon puna hetimore për identifikimin dhe kapjen e personave të dyshuar që fshihen pas ngarkesës me lëndë narkotike, si dhe vazhdon puna për indetifikimin e rrjeteve të tjera kriminale të cilat kanë të përfshirë në grupet e tyre edhe persona të punësuar në pika doganore.
