Ditën e sotmë në Krujë janë zbuluar 2 ambiente të përshtatura për kultivimine bimëve narkotive ose siç quhen ndryshe shtëpi bari. Policia ka finalizuar operacionin e koduar “Pëllumbi”, ku kanë rënë në pranga shtetasit Shpëtim dhe Fatjon Halili. Bëhet e ditur se operacioni u zhvillua në fshatin Qerekë të Krujës ku në banesën e shtetasit Shpëtim Halilit, u zbuluan dy ambiente që furnizoheshin me lidhje të paligjshme të energjisë elektrike dhe që ishin përshtatur me llamba dhe pajisje të tjera, për kultivimin e bimëve narkotike në ambiente të mbyllura.
Gjatë kontrolleve në këto ambiente, Policia e Shtetit ka sekuestruar në cilësinë e provës materiale, 268 bimë të dyshuara narkotike kanabisi, 51 llamba, 1 aspirator, 2 ventilatorë dhe 51 rritës të energjisë elektrike.
“Si rezultat i veprimeve operacionale në kuadër të këtij operacioni, u vunë në pranga shtetasit Shpëtim Halili, 39 vjeç, pronari i banesës dhe Fatjon Halili, 32 vjeç, vëllai i tij, të dy banues në Qerekë, Krujë. 32-vjeçari akuzohet se ka kryer lidhjen e paligjshme të energjisë elektrike që shërbente për kultivimin e bimëve narkotike”, bën të ditur zyrtarisht Policia e Shtetit.
Ndërkohë që materialet procedurale i kaluan Prokurorisë, për veprime të mëtejshme, për veprat penale “Kultivimi i bimëve narkotike” dhe “Vjedhja e energjisë elektrike ose impulseve telefonike”.
