Zbardhet vdekja e biznesmenit Armandi Nelaj nga Saranda, ngjarje e ndodhur disa javë më parë. Prokuroria e Vlorës ka dalë në përfundimin se 52-vjeçari ka humbur jetën si pasojë e një shpërthimi tritoli. Por tritoli nuk i ishte vënë atij., në fakt ishte i ndjeri ai që kishte marrë përsipër për të kryer një krim dhe lënda plasëse i shpërtheu teksa ishte në det.
Mbrëmjen e 24 qershorit, 52-vjeçari, së bashku me shokun e tij, i identifikuar si Eridion Muho do t’i vendosnin një anijeje një sasi eksplozivi. Bëhej fjalë për një anije të linjës Sarandë-Korfuz, “Finikas Lines”, në pronësi të Andrea Qirjakos. Shkak për sulmin e planifikuar ishte konkurrenca. Por teksa lundronte me lëndën plasëse, tritoli ka shpërthyer dhe i ka marrë jetën biznesmenit.
“Ky shtetas dyshohet se në bashkëpunim me shtetasin A. N. kishin planifikuar vënien e një sasie eksplozivi te njëra nga anijet që operon në linjën Sarandë-Korfuz, për motive konkurrence. Kjo sasi lënde plasëse ka shpërthyer aksidentalisht, gjatë tentativës për ta transportuar dhe vënë në anije, dhe si pasojë ka humbur jetën shtetasi A. N”, njofton Prokuroria e Vlorës, duke i dhënë kështu fund misterit të vdekjes në det.
Pas ngjarjes, fillimisht u dyshua se shpërthimi mund të kishte ndodhur si pasojë e bombulës së oksigjenit që mbante biznesmeni, por hetimet e thelluara provuan të kundërtën. Në fakt ishte 52-vjeçari, ai që kishte në plan të vriste dikë, por përfundoi i vdekur. Materialet për ngjarjen u referuan pranë Prokurorisë në Sarandë.
