Ashtu siç ishte paralajmëruar, kreu i Partisë Demokratike, Lulzim Basha ka mbledhur ditën e sotme Kryesinë e Partisë Demokratike.
Në fokus të kësaj mbledhjeje është miratimi i Reformës Zgjedhore dhe Basha do u tregojë anëtarëve të Kryesisë të gjithë procesin se si u arrit në dakordësimin e marrëveshjes për Reformën Zgjedhore.
Po ashtu, do të ngrihet dhe një grup pune në nivel ekspertësh për zbardhjen plotësimin e të gjithë kuadrit ligjor për marrëveshjen e arritur.
BalkanWeb raporton se Basha, i ka propozuar Kryesisë nisjen e procesit të përzgjedhjes, konsultimit dhe seleksionimit te kandidaturave për zgjedhjet parlamentare dhe vendore.
Vendimi i Bashës është një risi për politikën, pasi për herë të parë kandidatët për deputetë dhe kryetarë bashkie do të kenë votën e anëtarësisë së Partisë Demokratike.
Përfshirja e anëtarësisë në përzgjedhjen e kandidatëve politikë të PD është një detyrim që u përfshi në statutin e PD me kërkesë të kreut të opozitës, si konkretizim i premtimit të tij se ai nuk do të bënte më kurrë i vetëm listën e kandidatëve për deputetë apo për kryetarë bashkie.
PD po zbaton parimin “një anëtar, një votë” për përzgjedhjen e kandidatëve për deputetë dhe ky proces pritet të nisë nga 20 qershori deri në 15 shtator, duke e mbajtur të angazhuar në maksimum bazën e Partisë Demokratike.
