Gjatë protestave të opozitës në 2019 shkaktoi debate të shumta përdorimi i gazit lotsjellës nga qeveria kundrejt protestuesve.
Kreu i qeverisë, Edi Rama, deklaroi aso kohe se gazi ishte blerë në periudhën kur në pushtet ishte Sali Berishës, pas protestave të 21 janarit të vitit 2011.
Mirëpo, së fundmi ‘Gazeta Insajder’ ka zbardhur një dokument në të cilin thuhet se qeveria aktuale ka marrë në mënyrë të dyshimtë gazin lotsjellës nga Policia e Kosovës dhe kjo është bërë nëpërmjet një marrëveshjeje mes Rashit Qalajt, drejtorit të Policisë së Kosovës dhe Ardi Veliut, drejtorit të Policisë së Shqipërisë.
Nëpërmjet kësaj marrëveshjeje Rashit Qalaj ka thyer rregullat për përdorimin e armëve e gazit lotsjellës, pasi sipas rregullores në momentin e kontraktimit, blerësi-Policia e Kosovës, nuk lejohet që t’ia huazojë dikujt tjetër sepse është përdorues i fundit i armës dhe mban përgjegjësi se si e përdorë atë.
Por, Policia e Kosovës i ka huzuar 500 granata me gaz Policisë së Shqipërisë dhe ky vendim sipas Gazetës Insajderi, ka ardhur pas presionit që i është bërë nga presidenti i Kosovës, Hashim Thaçi.
Akuza në kërë rast bien edhe ndaj ministrit të Punëve të Brendshme, Sandër Lleshaj, i cili ka gënjyer publikisht kur ka folur për gazin lotsjellës që është hedhur kundër protestuesve të opozitës, pasi ka thënë “… për sa i përket gazit lotsjellës në konceptin buxhetor ne e kemi gjetur nuk e kemi blerë. Atë e hedh policia. Jam dakort me ju që është hedhur shumë, por ama janë shmangur plumbat”, kishte thënë Lleshaj.
Kujtojmë se, kryebashkiakja e Shkodrës, ende në detyrë, Voltana Ademi, ka ndritur një kallëzim penal ndaj Lleshaj dhe vartësve të tij për “shpërdorim detyre”.
Kjo padi është depozituar në Prokurorinë e Rrethit Gjyqësor Shkodër dhe Bashkia e Shkodrës kërkon edhe “pezullim të ushtrimit të detyrës publike” për personat e kallëzuar penalisht.
“Në cilësinë e Kryetares së e bashkisë Shkodër së bashku me qytetarët e Shkodrës po bënim manifestim paqësor , në mbrojte të të drejtave dhe lirive themelore Kushtetuese, mbrojtjen e drejtës së votës, e cila është parimi kryesor në zbatim të Kushtetutës. Manifestimi ishte paqësor dhe konform dispozitave ligjore në fuqi.Bashkia e Shkodrës, në kallëzimin penal për ministrin e brendshëm dhe punonjës të Policisë së Shtetit thotë se “siç tregojnë edhe pamjet filmike, punonjësit e Policisë së Shtetit kanë sulmuar me gaz edhe protestues të cilit ishin në kushte të pamundura shëndetësore, apo persona që po u vinin atyre në ndihmë. Kjo metodë kriminale, është shkelje flagrante e ligjit, që vë në rrezik serioz jetën e qytetarëve dhe personave që ishin duke i ndihmuar ato”, thuhet në kallëzimin penal kundër Lleshajt.
