Policia e Lezhës ka zbardhur sherrin e ndodhur një ditë më parë në qytet, duke identifikuar të gjithë personat e përfshirë në përplasjen fizike.
Dy prej tyre janë arrestuar, ndërsa katër të tjerë janë shpallur në kërkim.
Nga hetimet, këqyrja e pamjeve filmike dhe mbledhja e provave nën drejtimin e Prokurorisë, rezultoi se konflikti kishte ndodhur për motive të dobëta dhe ishte përshkallëzuar në dhunë të ndërsjellë.
Të arrestuarit janë Fatjon Gjini, 34 vjeç, dhe Ervin Nika, 37 vjeç, të dy banues në lagjen “Nënë Tereza” të Lezhës. Ata akuzohen për “Plagosje të rëndë me dashje” kryer në bashkëpunim, “Prishje të qetësisë publike”, si dhe për “Veprime që pengojnë zbulimin e së vërtetës”.
Gjini përballet edhe me akuzën e “Deklaratës së rreme përpara oficerit të policisë gjyqësore”.
Në kërkim janë shpallur Redian Margjonaj, 20 vjeç, banues në Tale, Kevin Ndoka, 20 vjeç, si dhe dy të mitur, A.D., 15 vjeç, dhe A.M., 17 vjeç.
Sipas policisë, ngjarja ndodhi më 11 prill 2025, në orën 12:02. Fillimisht, Gjini dhe Nika goditën me mjete të forta shtetasin Margjonaj.
Më pas, ky i fundit, së bashku me tre shokët e tij, goditën Gjinin me automjet dhe më pas e sulmuan fizikisht me mjete të forta, duke i shkaktuar dëmtime.
Policia vijon punën për të dokumentuar plotësisht ngjarjen dhe për kapjen e të shpallurve në kërkim.
Materialet i janë referuar Prokurorisë pranë Gjykatës së Lezhës për veprime të mëtejshme.
