Sipas raportimit të News24, mesazhe të zbuluara nga platforma e komunikimit SKY ECC tregojnë se figura të krimit të organizuar kanë ndikuar në renditjen e Jurgis Çyrbjas në listën e sigurt për deputet të Partisë Socialiste në zgjedhjet parlamentare të prillit 2021, për Qarkun e Durrësit.
Edmond Koçi, i njohur si Mond Çekiçi, i cili u vra në pranverën e vitit 2021, dhe Altin Hajri, një tjetër person i kërkuar nga drejtësia, dyshohet se ndërhynë për ta siguruar që Çyrbja të zinte një pozicion të lartë në listë.
News24 ka arritur të sigurojë përmbajtjen e disa mesazheve, ku Çekiçi i shkruan Çyrbjas se kishte kaluar orë duke lobuar për të në Partinë Socialiste, duke shprehur qëndrimin e tij personal dhe mbështetjen e të tjerëve.
Çyrbja i është përgjigjur me mirënjohje, duke thënë se kjo i ka ngritur moralin. Mesazhet zbulojnë gjithashtu një komunikim mes Çyrbjas dhe një personi ende të paidentifikuar, i cili i këshillon për qetësi dhe për të vazhduar përpjekjet për të siguruar pozicionin e tij në listë.
Ndërkohë, Altin Hajri i ka dërguar një listë me emra Çyrbjas, ku ai ishte renditur i shtati, duke konfirmuar më tej mbështetjen e Çekiçit dhe duke premtuar se do të fliste me Plarent Dervishajn, i njohur si “Lenti.”
Në listën përfundimtare të dorëzuar nga Partia Socialiste në KQZ, emri i Çyrbjas rezultoi i treti, duke e vendosur atë në një pozicion të sigurt për t’u zgjedhur deputet.
Pas këtyre ngjarjeve, Çyrbja u arrestua më 20 tetor nga SPAK, tre ditë pasi dorëzoi mandatin e tij të deputetit, dhe është nën hetim për korrupsion zgjedhor dhe akuza të tjera.
