Mëngjesin e sotëm Elbasani do zgjohej me një ngjarje të rëndë, pasi Ardian Çapja, koka e familjes Çapja dhe pronari i një sërë bizneseve ka rënë pre për herë të tretë e një atentati.
Ai është qëlluar me snajper, por arriti të mbijetonte, duke u plagosur në shpatullë dhe këmbë, teksa menjëherë u transportua drejt Spitalit të Traumës në kryeqytet.
Së fundmi, Dosja.al ka zbardhur detaje të reja në lidhje me atentatin ndaj Ardian Çapjas, që tronditi Elbasanin mëngjesin e sotëm.
Mësohet se një person i veshur si punonjës në fushën e ndërtimit, me kominoshe që përdorin punonjësit e llaçit, ka zbritur nga një automjet i llojit “Range Rover”, i Policisë dhe ka vrapuar drejt banesës së Çapjave, ku ka qëndruar për më shumë se një orë.
Ky person, mendohet të jetë kyç në atentatin e ndodhur sot.
Nga ana tjetër, pas atentatit, mësohet se janë angazhuar të gjithë njerëzit e Çapjave dhe janë vënë në ndjekje të autorëve, ndërsa disa prej tyre bllokuan rrugën kryesore në dalje të Krastës dhe pritën momentin kur me ‘shpejtësi skëterrë’ kaloi mjeti i atentatorëve.
Atentatorët janë larguar me ndihmën e disa personave të tjerë, që dyshohet se i prisnin në fillim të lagjes së re në Elbasan.
I plagosur ka ngelur edhe një zjarrfikës i cili ka tentuar të shuajë flakët tek makina e djegur e autorëve, por aty është përballur me shpërthimin e disa fishekëve.
Ardian Çapja doli rreth një orë më parë nga salla e operacionit dhe tashmë do të ngjitet në pavion, pasi nuk e ka të nevojshme që të shtrohet në reanimacion.
Edhe pse plumbi i kaloi pak centimatra pranë zemrës dhe një tjetër e mori në këmbë, Çapja është jashtë rrezikut për jetën dhe për të tretën herë, atentatorët dështuan që ta eliminojnë.
