Gjykata e Apelit ka lënë në fuqi vendimin e Agron Zhukrit, për kalimin e vulës dhe logos së PD, grupit të Rithemelimit të drejtuar nga ish-kryeministri Sali Berisha. Apeli vendosi që të mospranojë ankimimin e Enkelejd Alibeajt, duke njohur Rithemelimin si PD zyrtare.
Në një deklaratë për mediat pas vendimit, Flamur Noka i bëri thirrje të gjithë demokratëve që të bashkohen me Partinë Demokratike të Rithemeluar. Ai shprehu se kjo është një ditë triumfi për të vërtetën dhe ligjin, pasi Gjykata e Apelit vendosi të njohë PD-në e Rithemeluar si fraksionin zyrtar të partisë. “Kjo është ditë e së vërtetës, i bëj thirrje demokratëve të mblidhen kundër narkoshtetit dhe ti prijmë këtij sistemi,” tha Noka. Ai shtoi se është një ditë e mirë për demokratët dhe e keqe për regjimin, duke iu bërë thirrje të gjithë demokratëve që të kthehen në ‘shtëpinë e tyre’, PD-në, e cila është gjithmonë e hapur për ata që nuk janë nën ndikimin e qeverisë së Edi Ramës. “Ditë e keqe për regjimin sepse demokratët e bashkuar kanë synim nga sot ç’rënjosjen e regjimit,” theksoi Noka.
