Pas provokimit të presidentit Serb Aleksandër Vuçiç, ka reaguar edhe ministri i Shtetit për Diasporën Pandeli Majko.
Përmes një reagimi në rrjetet sociale, Majko shkruan se presidenti serb me këtë veprim tregon se i pëlqen papajtueshmëria. Ministri thekson se ky është problem i shtetit serb, pasi pavarësia e Kosovës nuk varen nga disa postime në rrjetet sociale.
“Sovraniteti i Republikës së Kosovë garantohet nga NATO dhe jo nga instagrami. Kjo është arsye e mjaftueshme që presidenti serb ti ofrojë shtetasve të vet, një të ardhme të cilën mund ta përballojnë.”, shkruan Majko në “Facebook”.
Kujtojmë se dje Aleksandër Vuçiç publikoi foton e hartës së Kosovës të mbuluar nga flamuri serb, duke e rikthyer edhe njëherë çështjen e nxehtë të pavarësisë dhe njohjes së Kosovës nga Serbia.
Ky veprim nxiti mjaft reagime nga gjithë shqiptarët dhe diplomatët e huaj të cilët e kritikuan si veprim të pa përshtatshëm.
STATUSI NGA PANDELI MAJKO
Me publikimin e fotos së Republikës së Kosovës me flamurin serb, Presidenti i Serbisë Vucic, tregon se i pëlqen papajtueshmëria. Ky është një problem i shtetit serb dhe i seriozitetit të zgjedhur në Beograd.
Republika e Serbisë nënshkroi një deklaratë në zyrën ovale të Shtëpisë së Bardhë për të respektuar procesin e paqes rajonale. Diplomacia e fotove në instagram zhvlerëson seriozitetin e shtetit serb në mardhëniet ndërkombëtare.
Sovraniteti i Republikës së Kosovë garantohet nga NATO dhe jo nga instagrami. Kjo është arsye e mjaftueshme që presidenti serb ti ofrojë shtetasve të vet, një të ardhme të cilën mund ta përballojnë. Roli i Gavrilo Principit në kohën e integrimit europian nuk mirëkuptohet. Serbia duhet të mos kapitullojë përballë pamundësive të saj! As në instagram!
