Teksa sot po zhvillohet Samiti i Ballkanit Perëndimor me BE-në, në Tiranë, Presidenti serb Aleksandër Vuçiç nuk ka hezituar të publikojë një foto në rrjetet sociale me kryeministrin Edi Rama. Në përshkrimin e fotos Vuçiç shkruan se ka biseduar me kryeministrin Rama për projektin rajonal të Open Balkan, por edhe për nisma të tjera të përbashkëta mes dy vendeve.
“Po flisja me mikun tim Edi Rama për nismën Open Balkans dhe çështjet tona të përbashkëta”, ka shkruar ai në një postim në Instagram.
Më herët në një deklaratë për mediat, Vuçiç tha se Serbia është shtet i pavarur dhe se është shumë pranë Rusisë.
“Serbia është shumë pranë Rusisë, është një vend i pavarur. Besoj se e keni lexuar dhe keni shkruar gjatë 9-10 muajve të fudnit se Serbia po ndiqte udhëzimet e Rusisë për të sulmuar të tjerët në Ballkan. Ne e kemi përgënjeshtruar këtë me vepra. Është e lehtë të ekspozosh lajmet e rreme, por e vërteta del dhe të gjithë e dinë të vërtetën. Serbia është një vend i pavarur dhe është drejt rrugëtimit të saj drejt BE-së”- tha ai.
Ndërkohë kujtojmë se Presidenti serb fillimisht u shpreh se nuk do të marrë pjesë në samit, por ndryshoi mendje dhe dje konfirmoi pjesëmarrjen. Në një situatë të agresionit rus në Ukrainë, BE e ka bërë të qartë qëndrimin që duhet të mbajë Serbia ndaj Rusisë, nëse aspiron të futet në BE.
