Është arrestuar në Liban shtetasi palestinez Fadi Alwan, i cili akuzohet për vrasjen e vajzës së tij 24-vjeçare në Shqipëri, dy muaj më parë.
49-vjeçari pritet të ekstradohet në Tiranë, ku ndaj tij është caktuar masa e sigurisë “arrest me burg” për veprën penale “vrasje për shkak të marrëdhënieve familjare”.
Sipas Policisë së Shtetit, arrestimi u bë pas hetimeve të zgjeruara dhe bashkëpunimit me autoritetet libaneze, përmes Interpol Tiranës dhe Interpol Beirutit.
Ngjarja ndodhi në 20 shkurt, në një apartament të marrë me qira në rrugën “Gjon Muzaka” në Tiranë, ku Fadi Alwan e goditi për vdekje vajzën e tij, Rayyan Alwan, me mjet prerës.
Fillimisht, hetimet u përqendruan te bashkëjetuesi i 24-vjeçares, por më vonë, sipas të dhënave të mbledhura nga autoritetet, u konstatua se autori i dyshuar i vrasjes ishte i ati.
Trupi i pajetë i të resë qëndroi për javë të tëra në morg pa u tërhequr nga asnjë familjar.
Vetëm pak ditë më parë, ai u tërhoq nga një avokat i dërguar nga nëna e saj dhe u transportua për në Liban, ku do të kryet edhe ceremonia e varrimit.
Nga hetimet rezulton se Fadi dhe Rayyan Alwan kanë hyrë në Shqipëri më 19 shkurt, duke u paraqitur si turistë.
Motivet e kësaj vrasjeje lidhen me konfliktet e vazhdueshme mes babait dhe vajzës, të cilat ishin përshkallëzuar pas divorcit të 24-vjeçares dhe mënyrës së saj të jetesës, e cila, sipas të atit, nuk ishte në përputhje me rregullat e fesë islame.
