Prokuroria e Foggias ka kërkuar burgim të përjetshëm me regjim të rreptë për Taulant Malajn, 47-vjeçarin shqiptar të akuzuar për një ngjarje të rëndë që tronditi Italinë në maj të vitit 2023.
Malaj akuzohet për vrasjen e dy personave dhe plagosjen e rëndë të një të treti, në një sulm brutal që ndodhi në banesën e tij në Torremaggiore.
Sipas hetimit të drejtuar nga prokurorët Antonio Laronga dhe Sabrina Cicala, Malaj dyshohet se vrau me thikë 51-vjeçarin Massimo De Santis i cili besohet të ketë qenë i dashuri i bashkëshortes së tij, dhe vajzën e tij 16-vjeçare, Jessica, e cila ndërhyri për të mbrojtur të ëmën. Gruaja mbijetoi, por mbeti e plagosur rëndë.
Gjatë seancës përmbyllëse, që zgjati mbi dy orë, prokuroria rrëzoi çdo mundësi për lehtësim të përgjegjësisë penale, duke argumentuar se sulmi ishte i qëllimshëm dhe me paramendim.
Si provë kyçe u paraqitën pamjet filmike të momentit të ngjarjes, në të cilat Malaj dëgjohet të pranojë aktin: “Shikoni atje, unë vrava. E bëra vetëm”.
Rasti konsiderohet një nga krimet më të rënda të viteve të fundit në rajonin e Capitanata-s. Gjykata pritet të japë vendimin në javët në vijim.
