Gjykata ka caktuar masën e sigurisë “arrest në burg” për 14-vjeçarin Mario Perlleshaj, i cili vrau me thikë bashkëmoshatarin e tij, Martin Canin, disa ditë më parë pranë shkollës “Fan Noli” në Tiranë.
Seanca për caktimin e masës së sigurisë është zhvilluar në ambientet e një spitali privat në kryeqytet, pasi mjekët nuk kanë lejuar transportimin e tij për shkak të gjendjes shëndetësore.
Gjykata ka vendosur të shqyrtojë çështjen në spital, duke kërkuar masën “arrest në burg” për Perlleshajn. Prokuroria ka vijuar hetimet për akuzën e “Vrasjes në rrethana cilësuese” dhe “Armëmbajtjes pa leje”.
Gjithashtu, adoleshenti nuk ka pranuar të flasë dhe të tregojë rreth ngjarjes, duke deklaruar se nuk mban mend asgjë. Ai nuk ka zbuluar as vendndodhjen e thikës, armës së krimit.
Ndersa, avokati paraqiti për gjykatën një raport mjekësor, sipas të cilit 14-vjeçari ka nevojë për mjekim të specializuar në spital.
Konflikti mes adoleshentëve ka ndodhur më 18 nëntor, rreth 300 metra larg shkollës “Fan Noli”. Pas përplasjes, Martin Cani humbi jetën në spital, ndërsa dy adoleshentët e tjerë, Luis Mecja dhe Mario Perlleshaj, morën plagë të lehta dhe janë jashtë rrezikut për jetën.
