34-vjeçari Donald Hoxha është ekstraduar nga Mbretëria e Bashkuar pasi ishte shpallur në kërkim ndërkombëtar nga Drejtoria e Interpolit. Ai u arrestua në Mbretërinë e Bashkuar në bazë të një mandati ndërkombëtar për ekstradim, të lëshuar pasi Gjykata e Rrethit Gjyqësor Elbasan vendosi masën e sigurisë “Arrest me burg”. Hoxha është dënuar për veprën penale “Vrasje me paramendim” dhe “Mbajtje pa leje dhe prodhim i armëve dhe municionit”. Akuzat lidhen me ngjarjen e datës 22 korrik 2009, ku, në bashkëpunim me shtetasit Armand Llakaj dhe Marjus Tafaj, dyshohet se ka vrarë Roland Rexhepin, i njohur ndryshe si “Doda”, në Elbasan.
Roland Rexhepi u qëllua për vdekje me dy armë tip kallashnikov mëngjesin e 22 korrikut, pranë banesës së tij, teksa po shkonte drejt parkimit ku kishte makinën. Marjus Tafa dhe Armando Llakaj, bashkëpunëtorët e tij në krim, janë dënuar përkatësisht me 23 dhe 24 vite burg. Ata janë përfolur të jenë të lidhur me fisin Çapja në Elbasan, një nga familjet më të njohura në atë zonë. Gjithashtu, po zhvillohet gjykimi i Florind Shabanit, i cili dyshohet të ketë pasur rol në organizimin e vrasjes, por ende nuk është përcaktuar qartësisht kush është porositësi i krimit.
