Prokuroria pranë Gjykatës së Shkallës së Parë të Juridiksionit të Përgjithshëm në Tiranë ka përfunduar hetimet dhe ka çuar për gjykim 64-vjeçarin Isuf Hasa, i akuzuar për veprën penale “Vjedhja me pasojë vdekjen”.
Ngjarja ka ndodhur më 13 janar të këtij viti në Shëngjergj të Tiranës, ku, sipas policisë, 81-vjeçari Xhemal Meta humbi jetën pasi u godit në kokë me një mjet të fortë, çekiç, nga fqinji i tij Isuf Hasa.
Hasa ka pranuar para prokurorisë se e ka goditur viktimën pas një grindjeje të shkaktuar nga konflikte të akumuluara ndër vite. Sipas 64-vjeçarit, arsyeja e përplasjeve ishin provokimet e viktimës, i cili shpesh i thoshte: ‘Nuk je burrë, rri 4 ditë në punë dhe nuk di çfarë bëhet me gruan tënde’. Pas debatit verbal, Hasa ka goditur viktimën dhe më pas i ka marrë nga trupi shumën e parave që ai mbante gjithmonë me vete, të lidhura në një qese në qafë.
Njoftimi i Prokurorisë së Tiranës
“Prokuroria pranë Gjykatës së Shkallës së Parë të Juridiksionit të Përgjithshëm, Tiranë, përfundoi hetimet dhe dërgoi në gjyq shtetasin I.H për veprën penale ‘Vjedhja me pasojë vdekjen’ parashikuar nga neni 141 i Kodit Penal.
Në kuadër të hetimeve mbi procedimin penal nr.258 të vitit 2025, u arrit të provohet se shtetasi I.H. shkaktoi vdekjen e fqinjit të tij, shtetasit Xh.M., i gjetur i pajetë në fshatin Shëngjin i Vogël në njësinë administrative, Shëngjergj të Tiranës më 13.01.2025.
Ekspertiza mjeko ligjore provoi se viktima humbi jetën si pasojë e dëmtimeve të forta në kokë, të cilat u shkaktuan nga mjete të forta si çekiçi. Ndërsa autori, shtetasi I.H. i pyetur dhe ripyetur nga prokuroria, pranoi se goditi fqinjin e tij pasi kishin pirë kafen e mëngjesit pas mllefit të akumuluar prej kohësh, duke qenë se viktima i thoshte shpesh se nuk ishte burrë, pasi rrinte 4 ditë në punë pa ardhur në shtëpi, e nuk dinte çfarë bëhej me gruan e tij. Autori gjithashtu pranoi që mori edhe sasinë e parave që viktima mbante gjithnjë me vete të lidhura me një qese në qafë.
Për shkak të marrëdhënieve të afërta që ekzistonin midis tij dhe viktimës, shtetasi I.H. ishte në dijeni të faktit që viktima mbante gjithmonë një qese me vete të lidhur në qafë, ku gjendeshin paratë e tij dhe pasi kreu aktit e vrasjes u largua drejt shtëpisë së vajzës së tij në Vorë, ku la armën e krimit dhe sasinë monetare.
Në përfundim të hetimeve, Prokuroria pranë Gjykatës së Shkallë së Parë të Juridiksionit të Përgjithshëm, Tiranë, dërgon në gjyq shtetasin I.H. për kryerjen e veprës penale ‘Vjedhja me pasojë vdekjen’ në dëm të viktimës, shtetasit Xh.M”, thuhet në njoftimin e prokurorisë.
