Gjykata e Lezhës ka dënuar me burgim të përjetshëm këtë të mërkurë Kristjan Cenajn. Ky i fundit akuzohet për vrasjen makabre të 16-vjeçarit Mariglen Gjonaj në vitin 2015. Avokati i familjes Gjonaj, Eduart Mullaraj u shpreh i kënaqur me vendimin, por kërkoi zgjerim te hetimeve, pasi sipas tij në këtë krim janë të përfshirë dhe persona të tjerë. Prokuroria kishte kërkuar edhe “aplikimin e periudhës se sigurisë” qe nënkupton se “edhe pasi të bënte 35 vite burg të mos i jepej mundësia për lirim për kohë me kusht”, por kjo nuk është pranuar nga gjykata.
Kristjan Cenaj u prangos në Rinas pasi prej vitesh jetontë në Itali. Në momentin që ai është nisur drejt Shqipërisë ku dhe do të merrte pjesë në dasmën e një të afërmi në Mamurras, Policia e Shtetit është vënë në dijeni. Me mbërritjen në Rinas, atij i është komunikuar urdhër arresti i lëshuar nga prokuroria dhe është dërguar në dhomat e paraburgimit të Komisariatit të Policisë Kurbin.
Vrasja e Mariglen Gjonaj u zbardh shtatë vite pasi kishte ndodhur dhe pak muaj nga gjetja e eshtrave të adoleshentit në Fushë Kuqe, në prill të vitit 2022. Nga ekspertiza u mësua se 16-vjeçari ishte dhunuar në mënyrë makabre dhe një goditje në kokë. Sipas hetimeve, Cenaj ka dashur t’i grabisë Gjonajt orën e llojit ‘Rolex’ dhe varësen e floririt që mbante në qafë. Ai hipi në makinë me të ditën që adoleshenti po nisej për ekskursion me shokët, por në Fushë Kuqe, e sulmoi, e vrau dhe e la të groposur.
