Detaje të reja kanë dalë në dritë lidhur me vrasjen e rëndë të 24-vjeçares nga Palestina, e ndodhur disa ditë më parë në Tiranë. Hetimet po marrin një tjetër drejtim, pasi dyshohet se Rayyan Alwan është masakruar nga i ati për çështje nderi.
Policia gjermane ka dërguar së fundmi informacione autoriteteve shqiptare në lidhje me këtë ngjarje.
Sipas këtyre të dhënave, më 26 shkurt, një ditë para zbulimit të krimit në Tiranë, nëna e viktimës kishte bërë një kallëzim në polici në Gjermani, duke denoncuar se po shantazhohej me një video intime të vajzës së saj, në këmbim të së cilës i kërkoheshin para.
Në dëshminë e saj, nëna ka treguar se nuk e përjashton mundësinë që pas këtij shantazhi të ishte vetë vajza e saj, pasi 24-vjeçarja më herët kishte dërguar disa shuma parash, duke insistuar që t’i kryente veprimet e vetme, gjë që kishte ngritur dyshime te ajo.
Ajo ka konfirmuar gjithashtu se ishte në dijeni se bashkëshorti dhe vajza e saj kishin udhëtuar në Shqipëri më 19 shkurt.
Dyshohet se gjatë këtij udhëtimi, 24-vjeçarja i ka treguar të atit për videon me të cilën po shantazhohej, çka mund të ketë çuar në tragjedinë e ndodhur.
