Kreu i Policisë së Shtetit, Muhamet Rrumbullaku ka dalë në një konferencë për shtyp ku ka bërë me dije detaje nga arrestimi i autorit të vrasjes së 31-vjeçarit, Eraldo Nevruzi në një hotel në Dhërmi, ngjarje e cila ka tronditur gjithë opinionin publik. Rrumbullaku tha se kanë nisur procedurat e ekstradimit të Gerald Shehut, i cili do të përballet me akuzat për këtë ngjarje të rëndë.
“Jemi në procedurat e ekstradimit të shpejtë të tij, kemi dokumentuar gjithçka që ka të bëjë me këtë mekanizëm,. Po shkojmë drejt finalizimit”, ka deklaruar ai gjatë deklaratës për shtyp.
Çfarë dimë deri më tani për ngjarjen?
Mesditën e sotme policia ka gjetur trupin e pajetë të tij në afërsi të përroit që lidh Gjipenë me Vunoin. Referuar të dhënave të deritanishme nga hetimet për krimin e rëndë, dyshohet se vrasja e të riut ka qenë i planifikuar nga ana e Shehut, pasi përgjatë mbrëmjes, kur Nevruzi sapo kishte marrë turnin e punës, ai e ka thirrur në një dhomë ku pushonte stafi duke u kujdesur të justifikojë edhe mungesën e tij tek vendi i punës.
Më pas ai e ka ekzekutuar i vetëm dhe me mbështetjen e dy bashkëpunëtorëve Daniel Qose dhe David Larti, ka bërë të mundur zhveshjen e trupit të viktimës, duke i marrë sendet personale, rrobat, dokumentat e identifikimit, të cilat ja kanë djegur tek furra e picerisë. Më pas Shehu është ndihmuar nga dy punonjësit e hotelit, duke e kanë mbështjellë trupin e viktimës me plastmas, dhe e kanë futur në mjetin tip ‘Audi a8’ duke u larguar më pas nga hoteli.
