Ditën e sotme, Prokuroria e Tiranës ka komunikuar vendimin e akuzës së policit Nevaldo Hadëraj 3 muaj pas vrasjes së Klodian Rasha, i cili u vra me 8 dhjetor duke ecur në rrugicën afër shtëpisë për shkak të shkeljes së orës policore.
Sipas raportimit të gazetarit të ABC News, Ermal Vija, ka bërë me dije se pas verifikimeve nga prokuroria, Hadëraj akuzohet për vrasje me dashje, gjë e cila e rëndon edhe më shumë akuzën e tij në raport me ligjin.
Nga hetimet e Prokurorisë së Tiranës, ka rezultuar se Klodian Rasha ishte i paarmatosur në momentin që është qëlluar me armë zjarri nga polici Nevaldo Hadëraj, ndryshe nga dëshmia që ka dhënë në polici.
Gjithashtu, ka rezultuar se arma e gjetur në vendin ku u vra Rasha nuk i përket atij, por bëhet fjalë për një pistoletë sportive që qëllon me plumba manovër.
Ekspertiza nuk ka gjetur asnjë gjurmë të Klodian Rashës në atë armë dhe se Prokuroria ka arritur në përfundimin se vrasja e Klodian Rashës ishte me dashje dhe mund të evitohej plotësisht nga polici.
Pas komunikimit të akuzës, pritet që brenda pak ditësh dosja të përfundojë në gjykatë ku edhe do të fillojë proçesi gjyqësor me akuzën e re për policin Nevaldo Hadëraj.
