Shklëzen Kastrati i cili u ekzekutua ditën e djeshme në Fier do të përcillet sot në banesën e fundit në orën 13:00.
Kastrati u vra ditën e djeshme në një atentat mafioz në hyrje të Fierit në vendin e njohur si “Rotondoja e Sheqit”. Policia ende nuk e ka identifikuar autorin e krimit. Vrasja u krye rreth orës 10:30 brenda automjetit të tij “Mercedes Benz”.
Pak metra larg vendit të ngjarjes, te “Mbikalimi i Baltëzës” policia gjeti një makinë tip “Range Rover” me targa greke të djegur, e përdorur nga autori i ngjarjes. Brenda saj ndodhej një arme zjarri tip “Scorpion” me silenciator, që mendohet se u përdor për ekzekutimin e 42-vjeçarit. Nga ekzaminimet u zbulua se Kastrati është goditur në pjesën e krahut dhe një plumb e ka prekur edhe në kokë.
Ende nuk ka një autor të identifikuar per vrasjen e 42-vjecarit, por në Policinë e Fierit janë shoqëruar për t’u marrë në pyetje dëshmitarët okularë të ngjarjes. Për më shumë detaje janë sekuestruar edhe pamjet e kamerave të sigurisë të bizneseve në këtë zonë, që mund të ndihmojnë në zbardhjen e krimit. Dyshimet e para të policisë janë se Kastrati mund të jetë vraraë për konflikte dhe hasmëri të vjetra.
