Ngjarja tragjike e ndodhur në mes të Tiranës, ku një 14-vjeçar u godit për vdekje me thikë pranë shkollës “Fan S. Noli”, ka sjellë një debat të ashpër në sallën e Kuvendit. Deputetja demokrate, Ina Zhupa, theksoi rënien e sigurisë në shkolla dhe kritikoi qeverinë për mungesën e masave të duhura mbrojtëse, duke e cilësuar incidentin si pasojë të dështimit të politikave të sigurisë.
Në përgjigje, ministrja e Arsimit, Ogerta Manastirliu, shprehu dhimbjen dhe tronditjen e saj për ngjarjen, duke apeluar për një reflektim më të thellë dhe angazhim të shtuar për krijimin e një ambienti më të sigurt për fëmijët. Ajo theksoi se është e domosdoshme të forcohen mekanizmat e parandalimit të dhunës dhe ndërhyrja e shpejtë për të luftuar të gjitha format e saj.
Reagimi i plotë:
Jemi thellësisht të tronditur nga ngjarja tragjike e ndodhur sot në rrugën “Qemal Stafa”, Tiranë, ku një konflikt mes tre të miturve çoi në humbjen e jetës së njërit prej tyre, nxënës i shkollës “Fan Noli”.
Ngushëllimet tona më të sinqerta i shkojnë familjes së nxënësit që humbi jetën, ndërsa urojmë shërim të shpejtë për nxënësin tjetër. Në të njëjtën kohë, kërkojmë nga institucionet ligjzbatuese që të kryejnë zbardhjen e menjëhershme të të gjitha rrethanave të kësaj ngjarjeje.
Siguria në shkolla dhe jashtë tyre ka qenë dhe do të mbetet një prioritet absolut, i bashkëpunimit mes Ministrisë së Brendshme, Policisë së Shtetit, Ministrisë së Arsimit, Pushteti Vendor, komunitetit dhe të gjithë shoqërisë.
Ministria e Arsimit dhe Sportit ka marrë në vazhdimësi, dhe është duke zbatuar masa konkrete për të garantuar që procesi i mësimdhënies, në të gjitha shkollat e Shqipërisë, të kryhet në mënyrë sa më të sigurt, të rregullt e me standarte.
Ndërkohë që Ministria e Arsimit dhe Sportit është maksimalisht e angazhuar për të siguruar mjedise sa më të sigurta për zhvillimin normal të mësimit në të gjithë Shqipërinë, mbetet gjithmonë thelbësor roli sa më aktiv i të gjitha palëve, prindër, mësues, punonjës të policisë së shtetit, institucione arsimore por edhe komuniteti, për të bërë të mundur parandalimin e ngjarjeve të tilla në të ardhmen.
