Ditën e sotme mbesa e Ziver Veizit, Zamira ka folur në lidhje me vrasjen e tij 12 vite më parë në protestën e 21 janarit. Gjatë homazheve në varrin e tij, Zamira ka deklaruar se edhe pse tashmë kanë kaluar 12 vite, drejtësia nuk është vendosur ende. Po ashtu ajo ka theksuar se ata nuk do të reshtin kurrë duke kërkuar drejtësi, ndërkohë që ka theksuar se shpresa e tyre mbetet SPAK-u.
“Kanë kaluar 12 vite dhe drejtësia akoma nuk është vendosur. Nuk do të reshtim kurrë së kërkuari drejtësi, kemi shpresën tek SPAK, shpresojmë që do të rihapë çështjen dhe drejtësia do të rivendoset”, tha mbesa e tij.
Por çfarë ndodhi më 21 janar 2011?
Më 21 janar 2011, në një protestë të organizuar nga Partia Socialiste, asokohe në opozitë, u vranë nga Garda e Republikës 4 protestuesit Ziver Veizi, Faik Myrtaj dhe Hekuran Deda dhe Aleks Nika. Kryeministri i kohës, Sali Berisha deklaroi se opozita kishte përgatitur një “grusht shteti” për të rrëzuar qeverinë, ndërsa opozita akuzoi qeverinë se vrau 4 qytetarë të pafajshëm. Në hetimin që u bë për vrasjen e protestuesve, të pandehur u morën Ndrea Prendi dhe Agim Llupo, ndërsa gjykata vlerësoi me vendim se vrasjet kanë ndodhur nga pakujdesia. Të dy të pandehurit u dënuan, ish-komandanti i Gardës, Ndrea Prendi me 1 vit ndërsa gardisti Agim Llupo me 3 vite burg. Por një publikim i ri ka dalë në dritë 12 vite pas ngjarjes. Gazetari Artan Hoxha publikoi dje audiopërgjimet e shërbimeve të huaja ku zbardhet urdhëri i marrë për të hapur zjarr ndaj protestuesve.
