Duket se shkak për krimin e trefishtë që ndodhi mëngjesin e sotëm në “Astir’, në kryeqytet, ka qenë shkëputja e marrëdhënies me vajzën e çiftit.
42-vjeçari që kreu masakrën e sotme në ‘Unazën e Re’, vrau fillimisht me armë zjarri vjehrrën dhe vjehrrin dhe më pas veten.
Ndërkohë mësohet se Majlind Lila bashkëjetonte me Nevila Matën prej 1 viti në Suedi, pasi ishin njohur në Shqipëri, por konfliktet mes tyre i çuan deri në ndarje. Lila fajësonte prindërit e saj, Bujar e Valentina Mata nga Korça, për ndarjen me 36-vjeçaren. “BalkanWeb” mëson se në rrethana ende të paqarta Lila ishte kthyer pardje nga Suedia, ndërkohë që Nevila Mata kishte qëndruar.
Duket se pas gjithë këtyre konflikteve, 42-vjeçari Majlind Lila, nga Burreli, në një gjendje të rënduar psikologjike për aktin e rëndë, kishte qëlluar veten me një mjet prerës dhe më pas ishte hedhur sipër kangjellave të ballkonit të banesës 1-katëshe për t’u vetëflijuar.
Ka qenë policia ajo që e ka transportuar drejt spitalit autorin, por ky i fundit nuk mundi t’i mbijetonte plagëve.
Mësohet se Lila banesën e tij e kishte në Fresk, ndërsa ende nuk dihen motivet që çuan në ndarjen me vajzën e viktimave. Aktualisht policia po heton në lidhje me ngjarjen e rëndë.
