Protesta e mbrëmshme në Tiranë dhe disa qytete të tjera, pas vrasjes së të riut Klodian Rasha nga policia, ka marrë vëmendje maksimale nga mediat botërore, të cilat raportuan gjerësisht në lidhje me atë që ndodhi në Shqipëri.
Mediat greke raportojnë për kryengritje në Tiranë për shkak të vrasjes nga policia të 25 vjeçarit Klodian Rasha. “Zougla” shkruan se mijëra protestues dëmtuen godinën e kryeministrisë dhe disa ministrive duke kërkuar drejtësi për të riun.
“DailyMail” bën një përmbledhje të të gjithë asaj që ka ndodhur gjatë dy ditëve të fundit në Shqipëri dhe thekson se i riu u vra sepse shkeli orën policore.
Ndërkohë, “Associated Press” (AP), është fokusuar në përplasjen e protestuesve me policinë në Tiranë, duke iu referuar deklaratës së mbrëmshme të policisë sipas të cilës vrasja e Klodian Rashës nga një oficer policie nuk mund të shfrytëzohet si shkak për dhunë në rrugët e kryeqytetit.
“TRT” raporton në versionin e saj anglisht se pas bulevardit para kryeministrisë, protestuesit shkuan para godinës së Drejtorisë së Përgjithshme të Policisë së Shtetit duke vijuar më pas me një marshim në orën 22:00 nga qendra për tek shtëpia e të ndjerit.
Kujtojmë se pas protestave të djeshme, policia arrestoi 3 persona si organizatorë , si dhe u shpallën në kërkim 8 persona të tjerë./Gazetareforma.com/
