Në Gjykatën e Posaçme Kundër Korrupsionit dhe Krimit të Organizuar u zhvillua këtë të mërkurë seanca gjyqësore ndaj Leonard Dukës, i akuzuar për vrasjen e Santiago Malkos.
Gjatë procesit, u shqyrtuan provat dhe dëshmitë e mbledhura në hetim, ndërsa mbrojtja ngriti një sërë dyshimesh mbi mënyrën e administrimit të tyre.
Avokatja e Dukës vuri në pikëpyetje ligjshmërinë e procedurës që u ndoq për marrjen në pyetje të dëshmitarit Blendi Teta. Sipas saj, prokurori i çështjes e kishte ndarë dëshmitarin nga seanca kryesore, duke i kërkuar të mos jepte deklarime.
“Kjo përbën shkelje të ligjit,” deklaroi ajo, ndërsa kërkoi që të thirren punonjësit e policisë që e shoqëruan Tetën dhe të jepnin sqarime mbi këtë veprim.
Gjithashtu, mbrojtja kërkoi sqarime mbi përdorimin e aplikacionit të komunikimit të enkriptuar “Sky ECC”.
Avokatja kërkoi të qartësohet nëse kodi që pretendohet se i përket Leonard Dukës, është përdorur vetëm nga ai apo edhe nga persona të tjerë. Në këtë kuadër, kërkoi dëshminë e vetë Dukës, si edhe të personave të tjerë të lidhur me çështjen, përfshirë Erlis Dukën, Ervis Martinajn dhe Muhamed Dukën, ky i fundit babai i të pandehurit.
Prokurori Behar Dibra i kundërshtoi kërkesat e mbrojtjes, duke i konsideruar të pabazuara dhe të panevojshme për këtë fazë të procesit.
Ai pranoi kontaktin me dëshmitarin Blendi Teta, por theksoi se nuk kishte asnjë shkelje ligjore. Sa i përket aplikacionit Sky ECC, prokurori sqaroi se identifikimi është bërë përmes metodave të policisë gjyqësore dhe nuk ka alternativë tjetër.
Për kërkesat për dëshmitarë shtesë, Dibra theksoi se disa prej tyre janë të pakapshëm, si në rastin e Ervis Martinajt, për të cilin ende nuk ka të dhëna për vendndodhjen.
Në fund të seancës, Gjykata vendosi të rrëzojë kërkesën për thirrjen e punonjësve të policisë, me argumentin se takimi mes prokurorit dhe dëshmitarit ishte shpjeguar në sallë.
Po ashtu, e konsideroi të panevojshme verifikimin e mëtejshëm të deklaratave të Blendi Tetës, duke sqaruar se aktet e Sky ECC janë pjesë e një procedimi të veçantë. Për dëshmitarët e tjerë, u deklarua se mund të merren në pyetje vetëm nëse kapen dhe njoftohen zyrtarisht nga policia.
Gjykata pranoi vetëm një nga kërkesat e mbrojtjes: thirrjen e Muhamed Dukës si dëshmitar në proces.
Seanca e radhës është caktuar për datën 24 qershor, në orën 09:00.
