Policia greke ka rihapur hetimet për vrasjen e 32-vjeçarit shqiptar Roan Brahimi, i njohur si “Sidi”, i cili u ekzekutua në maj 2024 në Virona të Athinës.
Hetimet tregojnë se atentati mund të ketë lidhje me një sagë hakmarrjeje nga Shqipëria, ku dyshohet se objektiv mund të ketë qenë edhe 46-vjeçari Edi Lulo, i njohur si Etmond Hysa, i cili jeton në Dubai. Hysa kishte ardhur në Greqi disa ditë para atentatit.
Në hetime është identifikuar një tjetër person i përfshirë, shqiptar me pseudonimin “Pigmakos” që është i dyshuar për lidhje me ngjarjen dhe mund të ketë mbetur i plagosur. Ai është një ish i dënuar për gjobvënie dhe vjedhje dhe është larguar nga vendi i ngjarjes para se të mund të merrej në pyetje nga policia.
Vrasja e 47-vjeçarit Irakli Davella, i cili u ekzekutua në atentat, ka ngritur dyshime lidhur me përfshirjen e tij në aktivitete kriminale, përfshirë një grup shqiptar-grek të përfshirë në gjobvënie dhe trafik droge.
Policia greke vazhdon të hetojë lidhjet e Davellës, përfshirë marrëdhëniet e tij me grupe mafioze dhe politikanë lokalë. Hetimet do të fokusohen tek Edi Lulo, i dyshuar për përfshirje në grupe të fuqishme kriminale në Shqipëri, si dhe mundësinë që të dy viktimat të kenë qenë objektivi i atentatit. Policia ende nuk ka zbuluar automjetin nga i cili u hap zjarr, i vjedhur më parë në Patisia.
