Dy personat e arrestuar për vrasjen e 23-vjeçarit Renis Dobra janë transferuar në paraburgimin e burgut 313 në Tiranë.
Petrit Çakrri dhe Fation Bushgjoka, të ndaluar disa ditë pas krimit, u lanë dje në “arrest me burg” nga Gjykata e Dibrës.
Vendimi për t’i zhvendosur në Tiranë është marrë për arsye sigurie, pasi dyshohet se në burgun e Burrelit ndodhen persona të afërm të viktimës dhe situata mund të përshkallëzohej.
Gjatë seancës gjyqësore ka pasur debate mes kryeprokurorit të Dibrës, Abaz Muça, dhe të pandehurit Fation Bushgjoka, i cili ka mohuar përfshirjen dhe ka kundërshtuar provat e paraqitura nga prokuroria.
Ndërkohë, organi i akuzës ka deklaruar se disponon prova të forta që përfshijnë të dhëna nga GPS-i i automjeteve dhe pamje nga kamerat e sigurisë përgjatë itinerarit të ngjarjes.
Krimi ndodhi më 8 korrik 2025, ndërsa trupi i pajetë i Renis Dobras u gjet një ditë më vonë pranë liqenit të Shkopetit.
Sipas policisë, katër persona kanë qenë të përfshirë në rrëmbimin e tij: Fation Bushgjoka, Petrit Çakrri (të arrestuar), si dhe dy vëllezërit Aleksandër dhe Kristi Bushgjoka, të cilët janë në kërkim.
Hetimet kanë zbuluar se Aleksandër Bushgjoka ka lënë vendin në datën 9 korrik, duke kaluar në Kosovë përmes kufirit, në një kohë kur ende nuk ishte shpallur në kërkim. Edhe për Kristi Bushgjokën dyshohet se është larguar në drejtim të Kosovës dhe aktualisht mund të jetë i fshehur atje.
Petrit Çakrri u arrestua disa ditë pas krimit, në hyrje të Tropojës. Pista kryesore e hetimit mbetet një konflikt për trafik droge në Gjermani mes viktimës dhe vëllezërve Bushgjoka. Megjithatë, hetuesit nuk përjashtojnë mundësinë që të arrestuarit dhe të kërkuarit të kenë vepruar me porosi nga persona të tretë, të përfshirë në rrjete të trafikimit të narkotikëve.
