Gjykata e Vlorës ka konfirmuar masën e arrestit në burg për Eris Mehmetaj, i cili akuzohet për sigurimin e kushteve për vrasjen e Renato Hoxhajt më 27 prill.
Mehmetaj u arrestua pasi dyshohet se ka pasur rol aktiv në krim, duke dorëzuar makinën e përdorur nga autori i krimit dhe duke ndihmuar në realizimin e vrasjes.
Policia ka identifikuar makinën e dyshuar dhe ka sekuestruar një celular me të dhëna të vlefshme për hetimin, ndërsa hetuesit dyshojnë se vrasja mund të ketë qenë një porosi nga një grup kriminal nga Emiratet e Bashkuara.
Viktima, 58-vjeçari Renato Hoxhaj, u qëllua për vdekje mëngjesin e 27 prillit, ndërsa po kthehej në shtëpi nga puna si roje objekti.
Ai mori disa plumba në kokë dhe trup. Bashkëjetuesja e tij, që e gjeti të pajetë pas të shtënave, raportoi ngjarjen në polici.
Hoxhaj ishte baba i dy fëmijëve dhe i divorcuar. Dëshmia e bashkëjetueses nuk ka dhënë informacione të tjera për autorët, dhe askush nga banorët nuk ka parë ndonjë person të dyshuar.
Mehmetaj ka mohuar lidhjen me krimin, duke deklaruar se makina e tij ishte përdorur nga një mik, dhe nuk dihet se çfarë është bërë me të.
Gjykata ka vendosur të mbajë të arrestuar 37-vjeçarin për akuzën e përkrahjes së autorit të krimit dhe sigurimit të kushteve për realizimin e vrasjes.
Pistat kryesore të hetimit përfshijnë konflikte të mundshme të fundit dhe përfshirjen e viktimës në ngjarje të tjera, ndërkohë që hetuesit dyshojnë se automjeti mund të jetë çmontuar për t’u fshehur pista.
