Ditën e dielë, rreth orës 2 të mëngjesit një 35-vjeçare shqiptare, e identifikuar si Nevila Pjetri, është vrarë në Itali. Trupi i pajetë i gruas shqiptare, u gjet gjysmë i zhveshur, pranë një përroi në Parmignola, në kufirin midis Toscana dhe Liguria.
Ndërkohë është zbardhur identiteti i autorit të krimit të dyfishtë në Itali, ku e vrarë mbeti një prostitutë shqiptare dhe një transeksual.
La Repubblica ka bërë publik emrin e personit të arrestuar për vrasjen e shqiptares Nevila Pjetri, ngjarje e ndodhur dy ditë më parë në Itali. Bëhet fjalë për 32-vjeccarin Daniele Bedini, një zejtar me precedentë penalë për grabitje.
Pasi ra në prangat e policisë, Bedini, banues në Aulla, ka mohuar të jetë autor i këtyre dy krimeve të rënda. “Jam i pafajshëm”, mësohet të ketë thënë para policisë i riu. Ngjarja e parë që u zbulua ishte vrasja e 35-vjeçares shqiptare, e cila u gjet e vrarë orët e para të së dielës në shtratin e lumit Parmignola në Marinella di Sarzana, ndërsa ishte vrarë me një plumb në kokë.
Hetuesit ranë në gjurmët e tij nëpërmjet pamjeve të kapura nga kamerat e sigurisë dhe falë hetimeve të kryera të dielën dhe ditën e djeshme. Hetuesit dyshojnë se 32-vjeçari mund të ketë kryer vrasje për herë të dytë, për të eliminuar personin që e kishte parë 2 ditë më parë teksa shqiptarja futej në makinën e tij, shkruan La Repubblica.
Ndërkohë, trupi i pajetë i transeksualit Carlo Bertolotti, 43-vjeç, me profesion parukier, u gjet mbrëmjen e së martës rreth 3 kilometra larg vendit ku u gjet shqiptarja.
