5 muaj nga vrasja e Pëllumb Metës në Durrës, prokuroria e Durrësit ka urdhëruar një akt ekspertim psikiatrik, për 3 fëmijët e të ndjerit, që mbahen në paraburgim, që nga zbulimi i krimit të rëndë në familje. Në rast se ata do të rezultojnë pa probleme të shëndetit mendor, ndaj 3 fëmijëve pritet që të ngrihet akuza e vrasjes me paramendim.
Prokuroria e ka ende të vështirë që të provojë shkencërisht se cili prej fëmijëve ka qëlluar me armë, pasi djali i madh Hyseni, dhe vajza Hygerta kanë dhënë disa versione për autorësinë e vrasjes në dëshmitë e tyre. Deri tani Policia dhe Prokuroria kanë dyshime se autori i vrasjes është pikërisht Hysen Meta, mirëpo në dëshminë e fundit para Gjykatës, ka qenë Hygerta ajo që ka pretenduar se ka qëlluar mbi babanë e saj.
Sa i përket konflikteve që mund të kenë pasur në familje, gjatë hetimeve të zhvilluara nga shkurti deri më sot është pyetur djali i madh Hyseni lidhur edhe me dokumentet e tokës që dispononte Pëllumbi dhe pse Hyseni i mbante vetë dokumentet dhe a kishte plan të shiste tokën.
49-vjeçari Pëllumb Meta u ekzekutua më 10 shkurt në banesën e tij në fshatin Shënavlash dhe më pas tre fëmijët e tij, Hysen, Amarildo dhe Hygerta Meta e varrosën në kasolle, në tentativë për të fshehur kufomën. Ngjarja makabër u zbulua nga policia dy javë më pas, 23 shkurt, pasi djali i madh i familjes, Hysen Meta, e denoncoi të atin të zhdukur.
Të tre fëmijët e Pëllumb Metës ndodhen të arrestuar pasi djali i madh, Hysen Meta, akuzohet për “vrasje në rrethana familjare”, ndërsa Hygerta Meta fshehje dhe asgjësim të kufomës. E njëjta akuzë rëndon dhe për djalin tjetër të familjes, Amarildo Metën.
