Dje policia e Shkodrës, prangosi 3 persona të dyshuar si bashkëpunëtorë të autorit të vrasjes së biznesmenit Nard Polia.
Pas marrjes në pyetje nga policia ata i kanë mohuar akuzat.
Sipas njoftimit të policisë dyshohet se këta persona kanë ndjekur gjatë gjithë ditës me mjetin tip Audi viktimën Nard Polia dhe më pas, e njëjta makinë, është vërejtur pas kqyrjes së kamerave të sigurisë duke kaluar tek Ura e Mesit, në vendin ku autori i dyshuar dogji motorin tip T Max me të cilin dyshohet se ka kryer vrasjen.
Pikërisht kjo makinë e cila dyshohet se ka ndjekur viktimën dhe më pas del edhe tek vendi ku u dogj motori ka çuar policinë në ndalimin e tre shtetasve.
Mjeti tip Audi i përket shtetasit Alfred Martini i cili është një prej të ndaluarve, por ky i fundit ka deklaruar në polici se këtë mjet ia ka dhënë që në mëngjesin e 20 marsit shtetasit K.S i shpallur në kërkim dhe 27-vjeçari që dyshohet si autor i vrasjes ia ka kthyer mjetin në orët e pasdites, pretendon i ndaluari Alfred Martini.
Martini bashkë me dy të ndaluarit e tjerë Gilbert Toma dhe Kleandro Toma kanë deklaruar se ata nuk kanë qenë fare në makinën në fjalë.
Policia gjithashtu dyshon se shtetasi K.S është ekzekutori me pagesë ndërsa ende nuk është arritur që të shkohet tek motivet që çuan në vrasjen e 32 vjeçarit Nard Polia ndërsa pista e vetme deri më tani mbetet e kaluara e tij para 8-9 vitesh në Itali ku është dënuar me 4 vite për prostitucion, trafik kokaine dhe vjedhje me thyerje të dy banesave.
