Seanca gjyqësore për Mario Përlleshajn, autorin e vrasjes së 14-vjeçarit Martin Cani, është shtyrë për në 27 mars.
Shtyrja ka ardhur për shkak të mungesës së të miturit tjetër, shokut të viktimës, Luis Meçes i cili mbeti i plagosur gjatë konfliktit.
Në seancë ishin të pranishëm prindërit e Martin Canit, Engjëll dhe Florina Cani.
Më 10 shkurt, Gjykata e Apelit rrëzoi kërkesën e Përlleshajt për zëvendësim të masës “arrest në burg”.
Ai akuzohet për “Vrasje në rrethana cilësuese” dhe “Prodhimi, mbajtja, blerja apo shitja pa leje e armëve të ftohta”. Përlleshaj mbahet në institucionin e të miturve në Kavajë.
Dënimi për këtë vepër mund të variojë nga 20 vite deri në burgim të përjetshëm, por për shkak të moshës së tij, maksimumi i mundshëm është 12 vite burgim.
Ngjarja tragjike ndodhi më 18 nëntor, kur Mario Përlleshaj, pas një konflikti mes dy të miturve, qëlloi me thikë Martin Canin, duke i shkaktuar plagë të rënda në bark.
Pas incidentit, Cani u përpoq të arrinte në shkollë, por humbi shumë gjak dhe ndërroi jetë në spital.
I plagosur mbeti edhe shoku i ngushtë i viktimës, Luis Meçja, ndërsa autori mori dëmtime në dorë dhe u trajtua në spital.
