Prokuroria e Përgjithshme e Tiranës ka përfunduar hetimet dhe ka dërguar për gjykim Marjo Përlleshajn, autorin e vrasjes së 14-vjeçarit Martin Cani dhe plagosjes së 15-vjeçarit Luis Meçja.
Ngjarja ndodhi gjatë një përleshjeje në oborrin e shkollës.
Përlleshaj akuzohet për “Vrasje në rrethana cilësuese” ndaj një të mituri dhe kundër dy ose më shumë personave, sipas nenit 79 të Kodit Penal.
Po ashtu, Prokuroria ka ndarë akte për veprën penale “Shpërdorim i detyrës” ndaj stafit të shkollës, lidhur me veprimet dhe mosveprimet e tyre. Ky procedim është regjistruar veçmas dhe hetimet vazhdojnë për të përcaktuar përgjegjësitë penale të individëve të përfshirë.
“Prokuroria pranë Gjykatës së Shkallës së Parë të Juridiksionit të Përgjithshëm, Tiranë, përfundoi hetimet dhe dërgon në gjyq shtetasin M.P., i akuzuar për kryerjen e veprës penale ‘Vrasje në rrethana cilësuese’ ndaj një të mituri dhe kundër dy ose më shumë personave, e parashikuar nga neni 79, shkronja a) dhe dh) i Kodit Penal, në dëm të të miturve M.C. dhe L.M.
Pas një hetimi të plotë dhe të gjithanshëm, Prokuroria pranë Gjykatës së Shkallës së Parë të Juridiksionit të Përgjithshëm Tiranë, ka përfunduar hetimet lidhur me procedimin penal nr.7676, të regjistruar datë 18.11.2024/
Gjithashtu, nga ana e organit të akuzës është vendosur ndarja e akteve të këtij procedimi, të akteve që lidhen me veprën penale “Shpërdorim i detyrës”, parashikuar nga neni 248 i K.Penal, lidhur me veprimet apo mosveprimet e stafit të shkollës, të cilat janë regjistruar në një procedim tjetër, dhe për të cilin hetimet vazhdojnë pasi është e domosdoshme kryerja e veprimeve të tjera hetimore, me qëllim individualizimin e fajësisë dhe përgjegjësive penale konkrete”, njofton prokuroria.
