Drejtoria e Burgjeve do të mbajë nesër një mbledhje për të vendosur në lidhje me transferimin e autorit të vrasjes së Martin Canit, Mario Perlleshaj.
Vendimi për transferimin e tij do të merret në varësi të gjendjes së tij shëndetësore, pasi 14-vjeçari mbeti dhe vetë i plagosur gjatë konfliktit.
Një komision i përbërë nga mjekë, Policia e Shtetit dhe Policia e Burgjeve do të bëjë një vlerësim të gjendjes shëndetësore të Perlleshajt për të përcaktuar nëse ai do të transferohet në Spitalin e Burgut ose në Burgun e të Miturve në Kavajë.
Vendimi do të merret pas analizës së situatës shëndetësore të autorit, i cili u plagos gjatë konfliktit, dhe kjo do të ndikojë në vendimin për vendin e transferimit të tij.
Vrasja e Martin Canit
Martin Cani humbi jetën mesditën e 18 tetorit pasi bashkëmoshatari i tij, Mario Perlleshaj, e qëlloi me thikë në bark. Ngjarja e rëndë ka ndodhur pas një konflikti mes dy të miturve që ka degraduar në përdorimin e thikës.
Pasi është goditur me thikë, Cani është afruar tek shkolla, ka ecur disa metra dhe pasi ka nisur të humbë gjak, është rrëzuar në trotuarin para shkollës. Si pasojë e plagëve të marra, Cani ka ndërruar jetë në spital. I plagosur nga ky sherr ka mbetur edhe shoku i ngushtë i viktimës.
Nga fotoja vihet re se autori ndodhet në një makinë, të cilët dyshohen se e kanë marrë atë nga vendngjarja, menjëherë pas krimit që kishte kryer. Ata që kanë marrë autorin e mitur nga vendi i ngjarjes, dyshohet se janë lajmëruar nga vetë ai dhe kanë ardhur me automjetet e tyre nga Sauku. Sipas informacioneve, ky grup nga Sauku rezultojnë të përfshirë edhe në konflikte të tjera.
