Gjykata e Tiranës ka caktuar datën për seancën paraprake ndaj të miturit Mario Përlleshaj, i akuzuar për vrasjen e bashkëmoshatarit Martin Cani.
Seanca do të zhvillohet më 10 mars, në orën 13:00, dhe do të drejtohet nga një gjyqtare e seksionit për të miturit.
Ndërkohë, Mario Përlleshaj vijon të mbahet në institucionin e të miturve në Kavajë, pasi u arrestua për ngjarjen e ndodhur në shkollën “Fan Noli”, ku ai ishte nxënës.
Martin Cani humbi jetën më 18 nëntor, pasi u godit me thikë nga bashkëmoshatari i tij, Mario Përlleshaj, pas një konflikti që nisi në oborrin e shkollës dhe agravoi jashtë saj.
Pasi u plagos rëndë, ai u përpoq të kërkonte ndihmë, por humbi ndjenjat dhe ndërroi jetë në spital. Në ngjarje mbeti i plagosur edhe shoku i tij i ngushtë, Luis Meçja, si dhe vetë autori, i cili më pas u trajtua në një spital privat.
