Shërbimi për Çështjet e Brendshme dhe Ankesat (SHÇBA), në Policinë e Shtetit, ka filluar hetimin e repartit “Shqiponja”, duke nisur nga emërimet e efektivëve dhe deri te shoqërimet e bëra nga ata gjatë kohëve të fundit.
Ky hetim vjen pas vrasjes së 25 vjeçarit Klodian Rasha nga efektivi Nevaldo Hajdaraj, për të cilin është hapur një tjetër hetim.
Nga verifikimet e deritanishme të bëra nga SHÇBA, mësohet se Nevaldo Hajdaraj kishte vetëm 1 muaj që i ishte bashkuar “Shqiponjave”, pasi më herët kishte punuar në komisariatin nr 5 të policisë në Kamzë.
SHÇBA ka deklaruar se po mblidhen denoncimet në kohë të ndryshme ndaj njësisë “Shqiponja”. Pas grumbullimit të ankesave, do të dilet me konkluzione se si rekrutohesh në këtë repart, çfarë detyrash kanë policët e kësaj strukture dhe a kryejnë apo jo instruktazh sa herë që marrin shërbimin?
Sipas SHÇBA-së, të dyshimta janë edhe veprimet e mëpasshme të policisë, për arsyen se përse efektivët ishin vetëm dy në shërbim në atë zonë dhe përse kur ata kërkuan ndihmë pasi kishin konstatuar një person të armatosur, nuk u asistuan në kohën e duhur me mbështetje policore.
Për këtë hetim administrativ, disa herë gjatë kësaj jave zyrtarët e SHÇBA-së kanë bërë takime me prokurorë të Tiranës, për shumë detaje e jo vetëm për kërkesën e rëndimit të pozitës së policit Nevaldo Hajdaraj, që nga “vrasje në kapërcim të mbrojtjes së nevojshme”, do të akuzohet për “vrasje me dashje”./Gazetareforma.com/
