Gjykata e Lartë konfirmoi dënimin me 18 vite burg për ish-policin e “Shqiponjave”, Nevaldo Hajdaraj, i cili në dhjetor të vitit 2020 vrau Klodian Rashën. Për shkak të përfitimit nga gjykimi i shkurtuar, dënimi i tij u ul në 12 vite heqje lirie.
Prokuroria e Apelit kishte kërkuar dënimin maksimal prej 20 vitesh dhe refuzimin e gjykimit të shkurtuar, por edhe kjo kërkesë u rrëzua nga Gjykata e Lartë.
Mbrojtja kishte kërkuar lirimin nga akuza për “vrasje me dashje” me pretendimin e vetëmbrojtjes, por kjo u hodh poshtë pasi u vërtetua se Klodian Rasha nuk kishte armë dhe nuk përbënte rrezik për efektivin.
Nevaldo Hajdaraj vrau Klodian Rashën në orët e mëngjesit të 8 dhjetorit 2020, ndërsa e qëlloi nga një distancë prej 5 metrash largësi.
Pamjet filmike kryesore të sekuestruara nga prokuroria e Tiranës, tregonin qartë veprimin e ish-policit, i cili duket se u pozicionua për të qëlluar me armën e shërbimit në drejtim të personit që ai po ndiqte.
Në filmim, sipas grupit të hetimit, dallohet se viktima është larguar me vrap. Ndërkohë nga një distancë shumë e afërt prej 5 metrash, ish-polici i pozicionuar i shtrirë në trotuar ka hapur dy herë zjarr drejt tij.
