Atentati tragjik ndaj ish-kryeministrit të Japonisë Shinzo Abe tronditi botën, teksa mediat botërore vijojnë t’i kushtojnë vëmendje të veçantë mënyrës se si u skenua krimi.
Kujtojmë që ekzekutimi i ish-kryeministrit Aben ndodhi në orët e para të mëngjesit të së premtes, teksa po zhvillonte një fushatë në qytetin Nara.
Në drejtim të tij u qëllua dy herë, por Aben e kapi plumbi i dytë, që më pas rezultoi fatal për të, pasi i mori jetën.
41-vjeçari Tetsuya Yamagami, i arrestuar në lidhje me këtë ngjarje të rëndë, po qëndronte mbrapa Shinzo Abe, në një distancë të afërt. Pas të shtënës së parë, Abe i cili po fliste, kthehet për të parë dhe në atë moment është qëlluar për herë të dytë, ku më pas ish-kryeministri ka rënë në tokë.
Yamagami u tha hetuesve pas arrestimit se mbante mëri ndaj një grupi të caktuar dhe se arsyeja që e çoi të kryente këtë akt ndaj ish-kryeministrit ishte se besonte se Abe ishte i lidhur me këtë grup.
Shinzo Abe cilësohej një nga politikanët me më shumë influencë në kohët moderne. Shinzo Abe është kryeministri që ka shërbyer më gjatë në këtë detyrë. Ai e rimori qeverisjen në vitin 2012 dhe qëndroi deri në vitin 2020 kur dha dorëheqjen për shkak të problemeve shëndetësore.
Abe ka thyer rekordet si kryeministri më jetëgjatë i Japonisë. Ai ka shërbyer si kreu i qeverisë në vitin 2006, për t’u rikthyer sërish në vitin 2012, kur qëndroi në pushtet deri në vitin 2020.
Në këtë vit, ai dha dorëheqjen për arsye shëndetësore.
