Detaje të reja janë bërë të ditura për autorët e vrasjes së dyfishtë mbrëmjen e djeshme në Laç.
Vëllezërit Markel e Manuel Bushi si dhe kushëririn e tyre, Vincent Bushi janë shpallur në kërkim për vrasjen e dy kushurinjëve Jushi pas një debati që kanë pasur në një lokal në qendër të qytetit.
Nga ajo që bëhet e ditur Markel Bushi është një përson jo pak i njohur për policinë, pasi në vitin 2012 bashkë me një person tjetër, kanë sulmuar me armë dhe kanë grabitur disa vajza. Policia e ka vënë në pranga pas ngjarjes, mirëpo ka mundur që të arratiset vetëm pak muaj më vonë ku edhe u dënua në mungesë nga gjykata me 9 vite burg.
Mirëpo në vitin 2013 do të vinte përsëri në vëmendjen e policisë pas një grabitjeje me armë, ku përsëri arriti të shpëtonte pas një kundërpërgjigjeje me armë që ka bërë.
Gjithashtu i dënuar ka qenë edhe Vincent Bushi, i cili ka qenë i arrestuar dhe dënuar në 2017 për armëmbajtje pa leje, ndërsa është liruar nga drejtësia me shërbim prove. Fillimisht ai u dënua me 6 vite burg, për shkak të gjykimit të shkurtuar iu ul masa në 1/3 dhe 2 vitet që i mbetën iu lanë në shërbim prove.
Policia e Kurbinit dhe FNSH janë në ndjekje të tre personave të dyshuar për ngjarjen, mirëpo ende nuk kanë mundur që t’i vendosin në pranga.
Sipas policisë, fillimisht sherri verbal për motive të dobëta ka nisur brenda ambienteve të një lokali mes kushërinjve Kelvin dhe Erjon Jushi me Manuel Bushin. Mirëpo ky i fundit ka thirrur vëllain e madh me kushëririn të cilët erdhën në lokal të armatosur.
