Një javë pas ngjarjes së rëndë që tronditi zonën e Matit, ku 23-vjeçari Renis Dobra u vra dhe më pas trupi i tij u hodh bashkë me automjetin në ujërat e liqenit të Ulzës, babai i tij ka rrëfyer përjetimet e asaj nate tragjike dhe komunikimin e fundit me të birin.
I ftuar në emisionin “Me Zemër të Hapur” në News24, babai i të ndjerit tregoi se ishte personi i fundit që foli me Renisin para zhdukjes.
“Të martën kemi folur bashkë për herë të fundit në orën 21:36 minuta. Më tha: ‘Babi po nisem për në shtëpi’. I thashë: ‘Mirëardhsh’. Renisi po vinte për në shtëpi nga qyteti i Burrelit, një distancë prej rreth 5 kilometrash, por djali nuk më mbërriti kurrë në shtëpi,” tha ai.
Ai shtoi se gjendja e bashkëshortes është shumë e rënduar psikologjikisht pas humbjes së djalit, ndërsa falënderoi policinë për hetimet e deritanishme.
Babai i 23-vjeçarit foli gjithashtu për momentet e para pas zhdukjes së të birit. Ishte nipi i tij që e kishte telefonuar, duke i thënë se Renisin e kishte ndaluar policia. Por kur kishte mbërritur në komisariat, policia kishte mohuar një gjë të tillë.
“Nipi më ka telefonuar në orën 22:03 minuta dhe më tha: ‘Dajë ku je, shpejto se policia ka kapur Renin’. Menjëherë dola dhe u nisa drejt Burrelit me nipin sepse mendova se ma ka kapur policia. Shkuam në komisariat. I pyeta nëse ma kishin kapur me makinë, por më thanë që një gjë e tillë nuk kishte ndodhur. Mora në telefon 129 dhe më thanë që do të më njoftonin ata,” rrëfeu ai.
Sipas dëshmisë, autorët që morën Renisin ishin maskuar si efektivë policie dhe i kishin kërkuar nipit të tij të largohej.
“Nipi im është afruar para se të më merrte mua në telefon dhe i kanë thënë: ‘Ik shpejt se jemi policia’,” tha ai.
