Ditën e djeshme bashkëshorti i 20-vjeçares britanike, që u vra në mënyrë makabre në sytë foshnjës së saj, ka pranuar se krimin e rëndë e ka kryer ai. Sot me anë të një kërkese zyrtare ka reaguar edhe komuniteti i Emigrantëve Shqiptarë në Greqi , të cilët kanë shprehur tronditjen e thellë për vrasjen e Carolinës, por kanë kërkuar nga mediat greke që të kërkojnë ndjesë publike, për shpifje ndaj shqiptarëve.
Ata shprehen se mediat kanë shfrytëzuar shqiptarët në Greqi, me propagandë të vazhdueshme, pa pasur asnjë bazë apo informacion zyrtar se ngjarjen mund ta kishin kryer vërtet. Kujtojmë se më herët me anë të një postimi në rrjetet sociale reagoi edhe zv.kryeministri i vendit Erion Braçe i cili kërkonte që mediat greke të kërkonin falje.
“Komuniteti i Emigrantëve Shqiptarë në Greqi shpreh tronditjen e thellë dhe neverinë e ngjallur nga krimi i rëndë, që tronditi mbarë opinionin publik në vend.
Si të gjithë, ndjekim të shokuar zhvillimet e fundit në hetimet e vrasjes së nënës së re në Glika Nera, nga vetë bashkëshorti i saj. Shprehim ngushëllime të sinqerta dhe mbështetjen pa kushte ndaj familjes së viktimës 20-vjeçare, Caroline Crouch!
Njëkohësisht kërkojmë të përdoren menjëherë reflekset e shtetit për të siguruar një reagim të gjerë e për të dërguar pa humbur kohë mesazhin e duhur, në çdo drejtim: Vrasësi i Caroline NUK ishte asnjë kriminel tepër i rrezikshëm “shqiptar” apo “gjeorgjian” etj.
Sërish media greke nuk humbet aspak shansin të kultivojë me vullnet të jashtëzakonshëm stereotipin e “kriminelit të huaj, emigrant”, akte që nxisin urrejtjen dhe racizmin në shoqërinë greke.
Dënojmë thellë aktin e frikshëm të vrasësit 33-vjeçar, i cili për 37 ditë me radhë luante rolin e bashkëshortit të hidhëruar.
Kërkojmë nga media greke të kërkojë falje në publik për shpifje dhe manipulim të përsëritur, duke shfrytëzuar shqiptarët në Greqi, me propagandë të vazhdueshme, pa asnjë bazë apo informacion zyrtar. Ndodh shumë vite tashmë, ka ardhur koha që ky kapitull të mbyllet njëherë e përgjithmonë, duke dënuar ashpër çdo autor përgjegjës!
Le të mos kultivojmë urrejtjen në shoqërinë tonë që është dëmtuar mjaft, por ku mund dhe duhet të bashkëjetojmë të gjithë harmonikisht. Le të jemi të bashkuar kundër çdo forme dhune, sulmi ndaj të pafajshmit e vulnerabëlit, akti kriminal, për një të nesërme më të begatë për të gjithë!”, deklaron Komuniteti.
