Presidenti i Republikës, Bajram Begaj, ka reaguar për ngjarjen tragjike të ndodhur sot pranë shkollës 9-vjeçare “Fan Noli” në Tiranë.
Presidenti Begaj ka shprehur ngushëllime për familjen e 14-vjeçarit që humbi jetën si pasojë e një konflikti me bashkëmoshatarët, duke uruar një shërim të shpejtë për nxënësin tjetër të plagosur.
Në mesazhin e tij, Kreu i Shtetit bëri thirrje për një reflektim më të thellë të shoqërisë shqiptare në lidhje me edukimin e brezave të rinj.
Mesazhi i Presidentit të Republikës:
“Ndarja nga jeta e 14-vjeçarit është për të gjithë ne një dhembje e madhe.
Ngushëllimet e mia më të ndjera familjes së tij!
Gjithashtu, uroj nga zemra shërim të shpejtë e të plotë për nxënësin e plagosur!
Kjo ngjarje e rëndë na shqetëson dhe na ngarkon me përgjegjësi për mjedisin ku po rrisim dhe edukojmë fëmijët tanë, duke përfshirë shoqërinë, shkollën dhe familjen.
Si shoqëri, kemi një sfidë të madhe përpara: Të frenojmë promovimin e dhunës në rrjetet sociale dhe hapësirën online, si dhe të ndalojmë çdo lloj shfaqje të dhunshme në shoqërinë tonë.
Fëmijët dhe të rinjtë tanë meritojnë të orientohen drejt modeleve pozitive të punës, shkollimit dhe arritjeve nëpërmjet tyre.
