Kolegji Zgjedhor i dha dritën jeshile procesit të numërimit të votave të ardhura nga emigrantët shqiptarë në Greqi, duke rrëzuar kërkesën e Partisë Demokratike për ndarjen dhe trajtimin e veçantë të këtyre zarfeve.
Në seancën e mbajtur këtë të premte, Kolegji la në fuqi vendimin e Komisionit të Ankimimeve dhe Sanksioneve, duke hedhur poshtë pretendimet e PD-së për parregullsi.
Partia Demokratike nuk ishte e pranishme në seancë, duke njoftuar përmes një emaili mungesën e saj me arsyetimin se lëvizja drejt gjykatës ishte e pamundur për shkak të kufizimeve të vendosura me rastin e Samitit ndërkombëtar në Tiranë.
Ndërkohë, edhe Komisioneri Shtetëror i Zgjedhjeve, Ilirjan Celibashi, vendosi që të vijojë pa vonesa numërimi i votave të ardhura nga jashtë vendit, përfshirë Greqinë.
Sipas tij, asnjë organ tjetër nuk ka kompetencë për të ndërhyrë në këtë proces deri në përfundimin e plotë të numërimit dhe tabulimit të rezultateve. Çdo shqyrtim i mundshëm i parregullsive do të bëhet vetëm pas kësaj faze.
Celibashi sqaroi se urdhri përfshin të gjitha materialet zgjedhore të ardhura jashtë territorit shqiptar, dhe zarfet nga Greqia do të numërohen sipas vendimit të Komisionit Qendror të Zgjedhjeve nr. 1121, datë 12.05.2025.
Vendimi i Kolegjit Zgjedhor dhe urdhri i Komisionerit vijnë pas bllokimit të përkohshëm të procesit të numërimit të votave të diasporës që kishte nisur të dielën mbrëma, më 11 maj.
Me këtë zhvillim, pritet që procesi të vijojë normalisht deri në përmbylljen e plotë të numërimit dhe shpalljen e rezultateve përfundimtare.
