Gjatë fjalës së saj mes protestuesve përpara Parlamentit deputetja e PD Albana Vokshi ka deklaruar se protesta e sotme është për të rikthyer pluralizmin politik në vend. Ajo gjithashtu ka kërkuar që policia dhe garda të heqin uniformat dhe t’i bashkohen protestës si qytetarë.
Vokshi shtoi se PD është e vendosur t’i dalë për zot vendit.
“Ka para për të rritur pensionet e pagat por Rama i merr dhe ja jep me valixhe McGonigal për përftime personale e për të shkatërruar opozitën. U përjashtuam se kërkuam 3 mocione. I hodhi poshtë Lindita me urdhër të Ramës. Ne nuk dorëzohemi. Sot vuri Gardën e policisë përballë nesh. ne nuk e kemi me policinë e Gardën, janë bij nënash. I bëj thirrje të bashkohen me popullin e të mos i shërbejnë Ramës e Rilindjes.
PD është e vendosur t’i dalë zot Shqipërisë e të mbroje demokracinë. një thirrje për çdo qytetar: Ejani bashkohuni me ne. Është çështje demokracie jo partie politike”, ka deklaruar ajo.
Të pranishëm në protestë janë disa deputetë të opozitës të përjashtuar nga seancat plenare. Ndërkohë disa deputetë të opozitës janë në Parlament në seancën e sotme plenare ku po zhvillohen debate të ashpra midis deputetëve të opozitës dhe mazhorancës.
