Sot Presidentja e Republikës së Kosovës, Vjosa Osmani, e ka shpallur të mërkurën ditë zie shtetërore për viktimat e aksidentit tragjik në Bullgari.
Kështu u bë e ditur përmes një komunikate të ZKM-së.
“Presidentja e Republikës së Kosovës, Vjosa Osmani, në mbështetje të legjislacionit në fuqi, ka marrë vendim të mërkurën, me 24 nëntor 2021, të shpallet ditë zie shtetërore në shenjë solidarizimi dhe nderimi të qytetarëve të Maqedonisë së Veriut, shumica dërmuese bashkëkombas tanë, të cilët kanë humbur jetën tragjikisht në aksident trafiku në Bullgari”,thuhet në komunikatën e ZKM-së.
Kujtojmë se të paktën 45 persona kanë mbetur të vdekur në një aksident tragjik që ka ndodhur në orët e para të mëngjesit në Bullgari.
Autoritetet e sigurisë rrugore hedhin dyshime se përplasja e autobusit mund të jetë shkaktuar nga ndonjë gabim njerëzor i shoferit ose mund të jetë bërë shkak ndonjë difekt teknik i autobusit. Një tjetër variant është se rruga është një aks i vështirë për të kaluar dhe se aty ndodhin shumë aksidente. Këtë version të fundi e përforcon dhe kryetari i komunës së Përnikut, ku ndodhi ngjarja e trishtë Stanislav Vladirimov e konsideron aksin si njërin nga më të vështirët për të udhëtuar. Ai pohoi se shkak i kësaj fatkeqësie mund të jetë bërë dhe moti i keq.
