Prej më shumë se dy javësh Shqipëria është duke u përballur me zjarret që janë përhapur në disa zona të vendit dhe ka qenë e vështirë për t’u mbajtur nën kontroll. Bashkimi Europian ofroi ndihmë duke sjellë në vendin tonë 3 helikopterë për shuarjen e flakëve, që tashmë kanë filluar nga puna.
Nuk vonoi as ndihma e Kosovës, pasi autoritetet shqiptare ndodhen në vështirësi përballë disa vatrave ende aktive dhe të tjerave që vazhdojnë të shfaqen. Presidentja Vjosa Osmani ka autorizuar vendimin e qeverisë së Kosovës për t’i ofruar ndihmë Shqipërisë, në pajtim me kompetencat e saj si komandante supreme e FSK-së. Tashmë trupat dhe pajisjet e FSK do do t`i vihen në dispozicion autoriteteve shqiptare për shuarjen e zjarreve.
“Pas vendimit të Qeverisë së Republikës së Kosovës për t`i ofruar ndihmë Republikës së Shqipërisë në shuarjen e zjarreve, Presidentja Vjosa Osmani, në cilësinë e komandantes supreme, në pajtim me kompetencat saj ka nënshkruar autorizimin për dërgimin e trupave dhe pajisjeve të FSK-së në operacion humanitar dhe në të njëjtën kohë e ka informuar për këtë veprim Kuvendin e Kosovës.
Trupat dhe pajisjet FSK-së, do t`i vihen në dispozicion autoriteteve shqiptare me qëllim të shuarjes dhe vënies në kontroll të zjarreve”, thuhet në njoftimin e presidencës së Kosovës.
