Presidentja në detyrë e Kosovës, Vjosa Osmani ka shkruar ditën e sotme se në zgjedhjet e 14 shkurtit kryeministër i vendit do të jetë Albin Kurti, që përfaqëson Lëvizjen Vetëvendosje.
Dy politikanët kanë arritur një marrëveshje për t’u futur bashkë në koalicion në këto zgjedhje, ndërkohë që Osmani pavarësisht se është Presidente në detyrë, e ka shprehur qartazi pozicionin e saj. Në një postim në Facebook Osmani ka shkruar dhe një mesazh për zgjedhjet, duke theksuar se vota ka dy funksione, për të ndëshkuar një model qeverisës dhe për të hapur një kapitull të ri politik.
Sipas saj, me kurajo e guxim kthesa politike do të vijë dhe në Kosovë.
Statusi nga Vjosa Osmani
Në historinë e popujve vota ka dy funksione: për ta ndëshkuar një model qeverisës dhe për ta hapur një kapitull të ri politik. Kthesat politike kërkojnë kurajo dhe guxim.
Më 14 shkurt me kurajo dhe guxim, e me vullnetin tuaj, Albin Kurti do të jetë kryeministër!
Ndërkohë që Gjykata Supreme në Kosovë mori vendimin përfundimtar për të lënë jashtë listës së zgjedhjeve Albin Kurtin dhe Albulena Haxhiun. Nga ana tjetër u lejuan të kandidonin Librun Aliu dhe Labinot Demi. Vendimi erdhi pasi Kurti ka marrë një dënim të formës së prerë me 1.3 vite burg si dënim për trazirat në Parlamentin e Kosovës ku u hodh gaz lotsjellës.
