Më 29 dhjetor, Autoriteti i Aviacionit Civil Italian, vendosi të pezullojë licensën e kompanisë “Fly Ernest”, pas ankesave të përsëritura të pasagjerëve.
Autoriteti italian i dha kohë kompanisë deri më 11 janar, që të korrigjohej, por diçka e tillë nuk ndodhi dhe më 11 janar “Fly Ernest” kreu fluturimet e fundit.
Pezullimi i licensës së “Fly Ernest”, shkaktoi kaos tek pasagjerët, të cilët kishin rezervuar udhëtimet e tyre.
Autoriteti i Aviacionit Civil duke iu referuar homologëve italianë, njoftoi pasagjerët se do të rimbursohen dhe duhet të bëjnë kërkesën tek faqja zyrtare e kompanisë.
Një gjë e tillë ndërkohë nuk ka ndodhur ende dhe nuk dihet se ku kanë përfunduar paratë e shqiptarëve.
Po të kthehemi pas në kohë, kjo situatë është e ngjashme me falimentimin e kompanisë së njohur “Belle Air”.
Në nëntor të 2013-ës, 53 mijë pasagjerë u mashtruan dhe “Belle Air” u largua duke lënë pas 56 milion euro borxhe.
Një investigim i “Shqiptarja.com”, ka dalë në konkluzionin se pas kompanisë “Fly Ernest” fshihet familja Xhelo, njësoj si tek kompania “Belle Air”.
Ilza Xhelo në një intervistë për mediat italiane, është prezantuar si bashkëthemeluese e shoqërisë “Fly Ernest”, e krijuar në Itali në 2015-ën, me kapital italo-danez.
Ndërkohë pronari i “Belle Air” është Ilir Xhelo, ndërsa administratori është Arbi Xhelo, përkatësisht babai dhe vëllai i Ilza Xhelos.
“Belle Air” u themelua në vitin 2005 dhe për 8 vite nuk ka pasur konkurentë
Kompania u largua nga vendi pa pasur as shqetësimin më të vogël nga institucionet, duke i shkaktuar 56 milion euro dëm buxhetit të shtetit.
Mirëpo pas Ilir Xhelos doli në skenë vajza e tij, e cila mesa duket është pika e lidhjes mes “Belle Air” dhe “Fly Ernest”.
Ndërsa shqiptarët presin rimbursimin nga “Fly Ernest”, janë shfaqur hijet e “Belle Air”, e cila ndërpreu rimbursimin dhe u zhduk nga vendi së bashku me milionat e eurove.
Deri në momentet që flasim prokuroria nuk ka mundur të konfiskojë pasurinë e Ilir Xhelos, e as të kthejë mbrapsh milionat e grabitura.
Pa u mbyllur akoma gropa e parë në buxhet e shkaktuar nga “Belle Air”, një tjetër sapo është hapur, po nga e njëjta dorë.
Ende pa u larë borxhet e para, Ilir Xhelo duket se ka lëvizur sërish poshtë hundës së autoriteteve shqiptare.
Falimentimi i “Fly Ernest” ngre dyshime të forta, për aftësinë e autoriteteve shqiptare.
Është e pashpjegueshme, se si ranë sërish në grackën e Xhelos.
Kjo situatë ka dy shpjegime, ose shteti shqiptar është i paaftë për të zbuluar skemat korruptive, ose Ilir Xhelo mbështetet nga një dorë e fortë, për të realizuar planet djallëzore për grabitjen e shqiptarëve.
Autoriteti i Aviacionit Civil është përgjegjësi kryesor për këtë situatë, pasi nuk ka bërë verifikimet e nevojshme, përpara se t’i jepte licensën kësaj kompanie.
U desh ndërhyrja e Aviacionit Civil Italian që të pezullohej licensa e kompanisë, pasi Aviacioni Civil shqiptar i kishte mbyllur sytë dhe veshët ndaj abuzimeve, duke çuar deri në degradimin e situatës.
Tashmë me falimentimin e “Fly Ernest”, na mbetet të presim e të shohim, nëse kësaj here përgjegjësit do të dalin përpara drejtësisë, apo do të mbetemi sërish te shprehja “Çudia e madhe 3 ditë zgjat”.
