Vjedhja e armatimeve në Pashaliman të Vlorës ka qenë një ngjarje që ka bërë jo pak bujë, mirëpo sot jemi në situatën që Ministrja e Mbrojtjes, Olta Xhaçka ka shkarkuar tashmë 15 ushtarak të kësaj baze nga detyra.
Megjithatë Presidenti Meta ka në këtë mes një detyrë të rëndësishme. Xhaçka i ka vendosur në tavolinë dokumentin ku kërkohet shkarkimi i Komandantit të Forcës Detare, Gjeneral Ylber Dogjanit, mirëpo, presidenti ende nuk ka firmosur asgjë.
I ftuar sot përball gazetarit të “Zërit të Amerikës”, Meta i është përgjigjur pyetjes se cila është arsyeja që po e vonon kaq shumë kthimin e përgjigjes nga ministres dhe mbi të gjitha cilat janë pretendimet e tij.
Meta ka thënë se nuk ka pasur mundësi të marrë një vendim për shkak të angazhimeve që ka pasur.
Zёri i Amerikёs: Zoti Meta! Muajin e kaluar nё bazёn e Pashalimanit ndodhi njё vjedhje e njё sasie municioni. Ministria e Mbrojtjes mori njё seri masash pak ditё mё parё. U shkarkuan 15 zyrtarё ushtarakё, ndёrkohё qё javёn e kaluar ministria e mbrojtjes iu ka dёrguar ju njё propozim pёr shkarkimin e komandantit tё Flotёs Detare, gjeneralin Ylber Dogjani. A keni marrё ndonjё vendim deri tani lidhur me kёtё kёrkesё?
Ilir Meta: Nuk kam patur mundёsi tё marr ndonjё vendim, pёr arsye se edhe nuk kam qenё nё zyrё gjatё kёsaj kohe, por megjithatё ekipi im po punon, por njёkohёsisht na duhet tё kemi njё vlerёsim mё tё plotё dhe mё shterues pёr rastin nё fjalё, pasi kemi edhe pretendimet nga ana e komandantit tё Forcave Detare, i cili pretendon qё ka paralajmёruar pёr pasojat apo rreziqet e njё fenomeni tё tillё, ka kёrkuar tё merren disa masa. Ne kemi kёrkuar tё shohim edhe vlerёsimin e ministrisё, tё inspektimit qё ёshtё bёrё dhe do tё marrim vendimin mё tё drejtё dhe do ta bёjmё publik nё mёnyrёn mё transparente.
